Corde voce mente pura Solvens Deo

Corde voce mente pura Solvens Deo laudis iura Idolorum spreta cura Laetare Pannonia De supernis illustrata Verbo vitae satiata Crucis Christi iam fers grata Libens testimonia Ergo per quem tibi datur Salus caelum reseratur Via vitae demonstratur Et iter iustitiae Hunc extollas digna laude Huius festum colens gaude Et gaudenti iam adplaude Cantico laetitiae Hic est Geisae ducis natus Visione praesignatus Ante ortum et vocatus Stephanus a stephano Credit pater et miratur Parit mater et laetatur Infans crescens exaltatur Ut cedrus in Libano Nam ut puer adolevit Mox virtutum donis crevit Caelos amans ima sprevit Haerens Dei filio Huius carnis tecta velo Mens intenta semper caelo Ardet tota Dei zelo Instat evangelio Per hunc Christus praedicatur Turba credens baptizatur Fides Christi dilatatur In tota Pannonia Hic ad instar Salomonis Struit templa ditat donis Ornat gemmis et coronis Cruces et altaria Ad docendum hic praelatos Viros ponit literatos Iustos fidos et probatos Ad robur fidelium Sic talentum sibi datum Deo reddens duplicatum Ab aeterno praeparatum Sibi scandit solium Ubi Christo sociatus Et a Christo sublimatus Regnat semper coronatus In superna patria Hunc devoti veneremur Hunc ex corde deprecemur Ut per ipsum sublevemur Ad caelorum atria