Potestate non natura Fit creator creatura

Potestate non natura Fit creator creatura Reportetur ut factura Factoris in gloria Praedicatus per prophetas Quem non capit locus aetas Nostrae sortis intrat metas Non relinquens propria Castitatis in tenorem Plasma gignit plasmatorem Virgo parit amatorem Lactat patrem filia Argumentum geniturae Huius nescit ius naturae Suae legis fracto iure Stupet de potentia Caelum terris inclinatur Homo Deus adunatur Adunato famulatur Caelestis familia Rex sacerdos consecratur Generalis quod monstratur Cum pax terris nuntiatur Et in altis gloria Causam quaeris modum rei Causa prius omnes rei Modus iustum velle Dei Sed conditum gratia O quam dulce condimentum Nobis mutans in pigmentum Cum aceto fel cruentum Degustante Messia O salubre sacramentum Hoc nos ponit in iumentum Plagis nostris dans unguentum Ille de Samaria Ille alter Elisaeus Reputatus homo reus Suscitavit homo Deus Sunamitis puerum Hic est gigas currens fortis Qui destructa lege mortis Ad amoena primae sortis Ovem fert in humerum Vicit regnat Deus homo Trahens orco lapsum pomo Caelo tractus gaudet homo Denum complens numerum Patris mater meta vatum Ora patrem iube natum Nos ut ducat ad optatum Plenum pace gloria Quo referti visu Dei Cantemus Alleluia